Në kuadër të aktiviteteve të Javës së Administratës Publike, Ministrja e Shtetit për Administratën Publike, Adea Pirdeni, prezantoi nismat kryesore që do të udhëheqin fazën e ardhshme të reformës së administratës shtetërore në vend. Fokusin kryesor të këtij procesi, ministrja e vendosi te investimi te kapitali njerëzor, performanca institucionale dhe përafrimi me standardet e Bashkimit Evropian.
Ndër masat konkrete të prezantuara janë:
• Forcimi i bashkëpunimit me zyrat e karrierës në universitetet publike, për të afruar profesionistët e rinj me administratën.
• Krijimi i një Programi të Mirëseardhjes për nëpunësit e rinj civilë në bashkëpunim me ASPA-n, për të mbështetur zhvillimin e tyre profesional që në fillim.
• Zbatimi i një programi bashkëpunimi me Bashkimin Evropian për konsolidimin e kulturës së punës, që do të shërbejë për përmbushjen e detyrimeve të procesit të negociatave.
• Nënshkrimi i një marrëveshjeje me Komisionin Evropian, e cila do të mundësojë angazhimin e zyrtarëve shqiptarë pranë institucioneve të BE-së për përfitimin e përvojës së drejtpërdrejtë.
Po ashtu, një shtyllë e rëndësishme e reformës mbetet zbatimi i modelit të ri të organizimit të administratës shtetërore, i miratuar së fundmi nga Kuvendi i Shqipërisë, i cili synon rritjen e llogaridhënies dhe qartësimin e strukturave administrative në funksion të shërbimeve më të mira për qytetarët.