Këshilli i Ministrave miratoi sot projektligjin "Për disa ndryshime në ligjin për organizimin dhe funksionimin e administratës shtetërore". Ky akt rregullator, i cili ndryshohet pas 14 vitesh, synon modernizimin e organizimit administrativ dhe përafrimin me standardet evropiane.
Rritja e transparencës dhe monitorimit
Projektligji parashikon vendosjen e një sistemi të unifikuar për monitorimin e performancës, duke standardizuar proceset e planifikimit dhe raportimit midis institucioneve të varësisë dhe ministrive përgjegjëse. Për herë të parë, raportet e performancës së çdo institucioni do të publikohen për qytetarët, me qëllim forcimin e transparencës dhe mundësimin e një vlerësimi më të qartë të rezultateve të arritura.
Riorganizimi dhe vendimmarrja
Reforma rikoncepton strukturën e institucioneve joministrore, duke i ndarë ato në dy kategori kryesore:
- Institucione varësie
- Agjenci autonome
Ndryshimet synojnë parandalimin e fragmentarizimit të administratës duke kufizuar krijimin e institucioneve me numër të vogël punonjësish, funksionet e të cilave pritet të përthithen nga ministritë përkatëse. Në nivelin e brendshëm, forcohet roli i drejtorive të përgjithshme, të cilat do të shërbejnë si instancat kryesore për vendimmarrjet rutinore. Kjo masë synon të reduktojë centralizimin aktual dhe të lehtësojë ngarkesën administrative që aktualisht përqendrohet te ministrat apo sekretarët e përgjithshëm, përveç rasteve kur ligji përcakton ndryshe.