Dy muaj pas arrestimit të ish-drejtoreshës së Postës Shqiptare në Durrës, Elisabeta Mataj, bashkëshorti i saj, Fetah Mataj, ka marrë një detyrë të re në strukturat bashkiake. Ai është caktuar përgjegjës i sektorit të mbetjeve urbane pranë ndërmarrjes së pastrim-gjelbërimit, institucion ku ai punon prej 11 vitesh.
Ngjarja për të cilën hetohet Elisabeta Mataj lidhet me mungesën e arkëtimit të shumës prej 69 milionë lekësh të reja në degët e Postës në Krujë dhe Shijak gjatë periudhës prill-maj 2026. Bashkë me të, në hetim për të njëjtën çështje janë vënë edhe ish-shefja e financës, Valbona Hoti Duni, si dhe arkëtarja Paola Dana. Sipas hetimeve, kamerat e sigurisë kanë dokumentuar 11 raste kur fondet, në vend që të dërgoheshin në degët përkatëse, përfundonin në zyrën e drejtoreshës. Prokuroria po heton gjithashtu dyshimet se paratë mund të jenë shpenzuar në lojëra fati.
Lidhur me këto zhvillime, Fetah Mataj ka reaguar duke pretenduar pafajësinë e bashkëshortes së tij. Ai ka bërë përgjegjëse kryesore për situatën ish-shefen e financës, Valbona Hoti Duni, duke kërkuar hetime mbi pasurinë dhe bizneset e saj. Mataj pretendon se pasuria e familjes Duni është shtuar ndjeshëm pas vitit 2020, duke ngritur dyshime për pastrim parash.