Pas një kontrolli të ushtruar nga Drejtoria Ekonomike e Postës Shqiptare, u zbuluan parregullsi në administrimin e fondeve që lidhen me shërbimet e pagesave në filialin e Durrësit. Në njoftimin zyrtar, institucioni bëri të ditur se janë marrë masa të menjëhershme administrative ndaj personelit përgjegjës dhe është depozituar kallëzim penal pranë organit të akuzës.
Posta Shqiptare sqaroi se fondet e prekura nuk kanë asnjë lidhje me fondet e pensioneve apo me pagesat e pensionistëve, duke garantuar sigurinë e këtyre të fundit. Sipas burimeve brenda institucionit, verifikimet pas rakordimit të arkës treguan një mangësi të konsiderueshme, e cila u thellua pas analizës së detajuar nga audituesit. Elisabeta Mataj, e cila mbante këtë pozicion që nga tetori i vitit 2025, ndodhet nën hetim.
Lidhur me dëmin financiar, raportimet mbeten të ndryshme. Disa burime flasin për një vlerë të mungesave prej rreth 700 mijë eurosh, ndërsa të tjera raportojnë shifra që arrijnë në 3 milionë euro. Hetimet e mëtejshme pritet të përcaktojnë shifrën e saktë dhe përgjegjësitë e secilit subjekt. Po ashtu, është konfirmuar dorëheqja e përgjegjëses së financës në këtë filial, Valbona Hoti Duni.
Përditësime
Ish-drejtoresha e Postës në Durrës, Elisabeta Mataj, ka bërë kallëzim penal ndaj shefes së financës dhe arkëtares Paola D., vetëm një ditë para shkarkimit të saj nga detyra. Mataj deklaron se e kishte njoftuar me shkrim Administratorin e Përgjithshëm të Postës Shqiptare për parregullsi financiare që në muajin mars. Njëkohësisht, ajo mohon çdo përfshirje ose akses në tërheqjen e fondeve që shërbyen si shkak për largimin e saj.
Ish-drejtoresha e Postës në Durrës, Elisabeta Mataj, dyshohet se i ka kërkuar 700 mijë euro shefes së financës, Valbona Duni, pak para se ta denonconte atë. Sipas burimeve, Duni ia ka dorëzuar shumën Matajt, e cila e ka kallëzuar vartësen ditën pasardhëse. Pas përfundimit të auditimit, administrata ka shkarkuar nga detyra Valbona Dunin.
Policia e Shtetit ka ndaluar Elisabeta Matajn, Valbona Hoti Dunin dhe Paola Danën për parregullsi financiare në Postën Shqiptare. Urdhri për ndalimin e tyre është lëshuar nga prokurori G. Frëngu, pas kallëzimit penal të depozituar nga institucioni. Hetimet kanë identifikuar Paola Danën si arkëtaren e përfshirë në skemën e dyshuar të shpërdorimit.