Një shoqatë islamike shqiptare në St. Gallen të Zvicrës po planifikon ndërtimin e një xhamie të re, me kosto të paraparë deri në 15 milionë franga zvicerane. Projekti, i vlerësuar me 10 milionë franga për ndërtesën dhe 5 milionë franga për tokën, është në fazë të hershme dhe ende nuk është paraqitur kërkesë zyrtare për leje ndërtimi.
Në fund të qershorit 2025, rreth 30 shqiptarë u mblodhën në një parking në Fürstenlandstrasse, midis shinave hekurudhore dhe një zone rekreative. Pas takimit, ata postuan në Facebook: "Allahu na ndihmoftë që realizimi i xhamisë sonë të re në St. Gallen të jetë sa më i lehtë." Iniciatorët kanë refuzuar të japin detaje shtesë për momentin.
Ndërtesa e re, e projektuar nga një arkitekt shqiptar nga Schlieren i Cyrihut – i cili ka dizajnuar edhe xhaminë shqiptare në Winterthur-Töss – do të ketë 1000 metra katrorë. Ajo përfshin një sallë madhështore lutjesh për qindra besimtarë, hapësira tregtare dhe një kafene të hapur edhe për jo-muslimanët. Projekti drejtohet nga Bashkësia Islame El-Hidaje, e cila menaxhon prej dekadash një xhami të vogël në periferi të St. Gallen.
Financimi parashikohet kryesisht nga donacionet. Një aktivitet në Gossau në shkurt 2025 mblodhi mbi 3 milionë franga, ndërsa një donacion 50,000 frangash erdhi nga ish-presidenti i Bashkësisë Islame të Boshnjakëve në Zvicër.
Imami Mehas Alija, që udhëheq xhaminë ekzistuese prej 15 vitesh, ka deklaruar më parë se radikalizmi dhe ekstremizmi nuk kanë vend midis shqiptarëve, ndërsa mbajtja e shamisë nga gratë myslimane është zgjedhje personale. Në vitin 2014, xhamia El-Hidaje u bë e njohur ndërkombëtarisht për një vrasje brenda saj midis shqiptarëve, e lidhur me një mosmarrëveshje për "nder".
Përditësime
Bashkësia Islame El-Hidaje ka prezantuar një specifikim të ri të dizajnit për xhaminë 15 milionë frangëshe në St. Gallen: ndërtesa do të ketë kupolë prej qelqi.