Kryeministri në detyrë i Kosovës, Albin Kurti, ka njoftuar nënshkrimin e një marrëveshjeje bashkëpunimi me Bashkësinë Islame të Kosovës për rindërtimin e Xhamisë së Ibrit.
Xhamia, e ndërtuar në vitin 1777 dhe e djegur më 2 maj 1999, do të rindërtohet sipas projektit të hartuar dhe të zbatuar me mbështetje qeveritare. Marrëveshja u nënshkrua në prani të Myftiut Naim Tërnava, kryeimamit Vedat Sahiti dhe ministres Saranda Bogujevci. Me këtë memorandum, Qeveria e Republikës së Kosovës mbështet ringritjen e këtij monumenti me rëndësi historike dhe kulturore.
Në vazhdim, u nënshkrua një memorandum tjetër bashkëpunimi me Bashkësinë Islame të Kosovës, që synon forcimin e ruajtjes dhe promovimit të trashëgimisë kulturore islame. Kurti theksoi se këto angazhime janë pjesë e përkushtimit të vazhdueshëm për mbrojtjen e trashëgimisë kulturore pas dëmeve të shkaktuara gjatë luftës së viteve 1998-1999.
Investimet në këtë fushë do të vazhdojnë edhe në vitet në vijim. Kurti e kishte premtuar rindërtimin e kësaj xhamie gjatë fushatës elektorale të mëparshme, duke e cilësuar si trashëgimi kulturore që duhet ruajtur për brezat e ardhshëm. Xhamia e Ibrit, e njohur edhe si Xhamia e Urës së Ibrit në Mitrovicë, simbolizon identitetin dhe historinë lokale.