Albin Kurti, kryeministri i Republikës së Kosovës, mori pjesë në ceremoninë solemne për shënimin e Ditës së Pavarësisë në ambientet e Bibliotekës Kombëtare të Kosovës.
Në fjalën e tij, Kurti tha se institucioni simbolizon dijen e të gjitha fushave dhe qëndrueshmërinë e identitetit kombëtar. “Rruga drejt 17 shkurtit 2008 ishte e gjatë dhe e mundimshme. Ajo u ndërtua me sakrificë, me qëndresë dhe besim të palëkundur në të drejtën tonë për të jetuar në liri”, deklaroi ai.
Kurti kujtoi se nga tetori i vitit 1990 deri në qershor të vitit 1999, biblioteka u përball me masa të dhunshme, spastrim të koleksioneve, politika të njëanshme të pasurimit dhe përjashtimin e librit shqip nga fondet. E megjithëkëto, fjala shqipe mbijetoi dhe gjeti strehë në raftet, arkivat dhe ndërgjegjen e atyre që besuan se liria fillon me ruajtjen e kujtesës dhe të së vërtetës.
Ai vlerësoi transformimin e fundit të bibliotekës, që ndërthur trashëgiminë me standardet digjitale. Me përkrahjen e Qeverisë së Republikës së Kosovës dhe përkushtimin e stafit, digjitalizimi ka kapacitet prej rreth 15 mijë faqesh në ditë, duke ngritur kapacitetet drejt praktikave evropiane bashkëkohore.
Në përfundim, Kurti falënderoi kontribuuesit në ruajtjen e kujtesës kolektive. “Një shtet që ruan kujtesën, ndërton me siguri të ardhmen e vet. Kjo është Kosova që po ndërtojmë: një shtet që e nderon historinë, që e ruan trashëgiminë dhe që investon në dije si garanci e së ardhmes”, tha ai.