Albin Kurti, kryeministër i Kosovës, mori pjesë në ceremoninë e 75-vjetorit të themelimit të Arkivit të Kosovës. Ngjarja u zhvillua më 23 mars 2026. Ai ishte i shoqëruar nga ministrja e Kulturës dhe Turizmit, Saranda Bogujevci, dhe ministri i Punës, Familjes dhe Vlerave të Luftës Çlirimtare, Andin Hoti.
Kurti vlerësoi se ky përvjetor nuk është thjesht shënim kohe, por dëshmi e rrugëtimit të gjatë për ruajtjen e kujtesës kolektive. “Për shtatë dekada e gjysmë arkivat kanë qenë më shumë se një institucion, ato kanë qenë mbrojtës të së vërtetës historike dhe të ruajtjes së identitetit tonë kombëtar e shtetëror. Në fondet e tyre ruhen dokumente të cilat dëshmojnë historinë, sfidat dhe arritjet tona të përbashkëta si shoqëri”, tha ai.
Kryeministri shprehu mirënjohje për kontribuuesit ndër vite në ndërtimin dhe zhvillimin e institucionit. Ai theksoi digjitalizimin masiv të materialit arkivor, që mundëson ruajtje më të sigurt dhe qasje më të lehtë për qytetarët dhe studiuesit. Gjithashtu, përmendi lansimin e sistemit elektronik për menaxhimin e materialit arkivor si hap të rëndësishëm drejt modernizimit dhe rritjes së efikasitetit.
“Arkivat janë gardianët e trashëgimisë dokumentare. Ato janë kujtesa e shkruar e shtetit dhe e shoqërisë sonë, një pasuri që duhet ruajtur, kultivuar dhe transmetuar me përgjegjësi të plotë te brezat që vijnë pas nesh”, deklaroi Kurti. Ai riafirmoi dedikimin për mbështetje të mëtejshme të institucionit, duke e quajtur investimin në arkiva si investim në të vërtetën faktike, kujtesën historike dhe qëndrueshmërinë shtetërore.