Albin Kurti, kryeministër i Kosovës, ka përkujtuar 27-vjetorin e masakrave të kryera më 26 mars 1999 në Krushë të Madhe, Krushë të Vogël, Suharekë, Padalishtë, Landovicë dhe Gjakovë.
Në mesazhin e publikuar në Facebook, Kurti rikujtoi se në Krushë të Madhe u vranë 243 civilë, ndërsa në Krushë të Vogël 113 të tjerë. Forcat e armatosura të Serbisë zhdukën me dhunë 64 banorë të Krushës dhe shkatërruan mbi 700 shtëpi, së bashku me objekte fetare e kulturore.
Ai përmendi gjithashtu vrasjen e 48 anëtarëve të familjes Berisha në Suharekë, trupat e të cilëve u gjetën në varrezën masive të Batajnicës pranë Beogradit, 19 anëtarëve të familjes Imeraj në Padalishtë, 23 të vrarëve në Landovicë dhe 6 në Gjakovë.
Kurti i cilësoi këto vrasje e zhdukje me dhunë dëshmi të fuqishme të gjenocidit të Serbisë në Kosovë. Ai theksoi se përballë këtyre krimeve ka vetëm një përgjigje dinjitoze: vendosjen e drejtësisë si imperativ moral, juridik dhe historik.
Sipas tij, Republika e Kosovës ka përgjegjësi të dyfishtë: ndaj së kaluarës, duke dokumentuar dhe kërkuar llogari për krimet e luftës, krimet kundër njerëzimit dhe gjenocidin; ndaj së ardhmes, duke u angazhuar për paqe të qëndrueshme dhe jetë më të mirë për brezat e rinj.
Kurti shprehu nderim për viktimat, duke thënë se me zemrat plot dashuri, respekt e krenari përkulen para kujtimit të tyre dhe e marrin rënien e tyre si udhërrëfim. "I përjetshëm qoftë kujtimi për ta!", përfundoi ai.
Përditësime
Kryeministri Albin Kurti, në përkujtim të 27-vjetorit të masakrave të 26 marsit 1999, deklaroi: „Si institucione e si qytetarë të Republikës, po angazhohemi bashkë për Republikën tonë, ashtu siç ishin idealet e dëshmorëve e martirëve, ashtu siç janë dëshirat e rinisë e ëndrrat e fëmijëve tanë."
Ai shtoi: „Përkulemi sot e gjithmonë para kujtimit të të gjithë të vrarëve tanë. Rënien e tyre me flijim e me sakrificë, e kemi udhërrëfyes."