Komuna e Prishtinës ka rifilluar punimet në rrugën Qamil Hoxha pas një viti ndërprerje. Projekti ishte bllokuar për shkak të nevojës për leje nga Instituti i Kosovës për Mbrojtjen e Monumenteve (IKMM), pasi rruga ndodhet brenda zonës mbrojtëse të Qendrës Historike të Prishtinës dhe pranë aseteve të trashëgimisë kulturore arkitekturore.
Ministria e Kulturës, Rinisë dhe Sportit (MKRS) ka njoftuar se Komuna e Prishtinës aplikoi për leje pranë IKMM-së dhe projekti u miratua pas shkëmbimit të rekomandimeve. Punimet po zbatohen në përputhje të plotë me bazën ligjore, veçanërisht nenin 6 të Ligjit Nr. 02/L-088 për Trashëgiminë Kulturore.
MKRS thekson se çdo ndërhyrje në zona mbrojtëse kërkon leje të shkruar nga institucioni kompetent. Ministria bën thirrje për investitorët publikë dhe privatë të mos nisin punime pa aprovime paraprake, për shkak të pasojave ligjore.
Në njoftim përmendet se edhe vetë MKRS-ja, kur ka qenë investitore, është përballur me masa të ngjashme për veprime të paautorizuara. Ministria ripërsërit gatishmërinë për bashkëpunim transparent dhe të shpejtë, duke harmonizuar projektet me kriteret profesionale të mbrojtjes së trashëgimisë kulturore.