Ministria e Turizmit, Kulturës dhe Sportit ka hapur konkurrimin për dhënien në përdorim të 700 metrave katrorë ambiente shërbimi në kalatë e Rozafës, Kaninës, Prezës dhe Petrelës. Kontratat parashikohen deri në 20 vjet, me të drejtë rinovimi, ndërsa investimet do të financohen nga operatorët fitues.
Katër procedurat u publikuan në Buletinin e Njoftimeve Zyrtare më 19 tetor 2026. Ato synojnë rijetësimin e hapësirave të përcaktuara brenda monumenteve të kulturës të kategorisë së parë, përmes projekteve që do të realizohen nga subjektet e përzgjedhura.
Sipërfaqja më e madhe ofrohet në Kalanë e Kaninës, në Vlorë, ku konkurrimi përfshin një ambient shërbimi prej 300 metrash katrorë. Në Kalanë e Rozafës, në Shkodër, është përcaktuar një hapësirë prej 200 metrash katrorë në oborrin e tretë. Dy procedurat e tjera përfshijnë nga 100 metra katrorë në oborret e kalave të Prezës dhe Petrelës, në zonën e Tiranës.
Konkurrimi përfshin dhënien në përdorim të ambienteve të përcaktuara të shërbimit, jo të kalave në tërësi. Të katër pasuritë kanë statusin e monumentit të kulturës dhe përdorimi i hapësirave duhet të jetë në përputhje me legjislacionin për trashëgiminë kulturore.
Subjektet e interesuara duhet të dëshmojnë kapacitete të mjaftueshme financiare, teknike dhe profesionale për realizimin e projekteve dhe administrimin e pasurive kulturore. Kriteret kërkojnë garanci financiare për miradministrimin e pronës, në vlerë jo më të ulët se 10 për qind e investimit të propozuar. Xhiroja mesatare vjetore e tri viteve të fundit duhet të jetë të paktën 50 për qind e vlerës së investimit të parashikuar.
Projektet do të vlerësohen sipas planeve për ndërhyrje ruajtëse dhe mbrojtëse, nivelit të investimit dhe cilësisë së projektit të rijetësimit. Secili prej këtyre tri kritereve vlerësohet me 20 pikë, nga 100 pikë gjithsej. Pjesa tjetër e vlerësimit lidhet me përputhshmërinë e veprimtarisë me funksionin dhe vlerat kulturore të monumentit, promovimin e trashëgimisë, garantimin e aksesit publik dhe cilësinë e shërbimeve.
Operatorët duhet të sigurojnë gjithashtu burime financiare vjetore për ruajtjen dhe mirëmbajtjen e pasurive kulturore. Në rastet kur ka vlera ose gjurmë arkeologjike, kërkohet të sigurohen edhe burimet për studimet përkatëse. Afati për dorëzimin e ofertave është 12 nëntor 2026, ora 10:00.