Kryeministri në detyrë, Albin Kurti, ka marrë pjesë në prezantimin e ecurisë së hartimit të Master Planit për Kompleksin Memorial Adem Jashari në Prekaz. Ky projekt është cilësuar nga kreu i ekzekutivit si një ndër nismat më të rëndësishme për ruajtjen e kujtesës historike, trashëgimisë kulturore dhe identitetit shtetëror të Kosovës.
Sipas Kurtit, trajtimi i këtij kompleksi nuk është thjesht një projekt planifikimi apo muzealizimi, por një detyrim institucional për të dokumentuar sakrificën e familjes Jashari. Për realizimin e këtij procesi, janë angazhuar ekspertë vendorë dhe ndërkombëtarë, ndërsa procesi po zhvillohet përmes një konkursi ndërkombëtar.
Në lidhje me dinamikën e punimeve, u bë e ditur se gjatë vitit 2026 pritet përfundimi i projekteve për konservimin e Kullave të Rezistencës. Pas kësaj faze, Ministria e Kulturës dhe Turizmit pritet të iniciojë procedurat e prokurimit për zbatimin e punimeve, duke shënuar kalimin nga faza e projektimit në ndërhyrje konkrete konservuese në terren.
Qeveria e Kosovës rikonfirmoi përkushtimin për sigurimin e kushteve të nevojshme institucionale, profesionale dhe financiare, me synimin që të gjitha ndërhyrjet të realizohen sipas standardeve më të larta teknike, në përputhje me rëndësinë historike të kompleksit.