Bashkia e Tiranës ka një plan rezervë në rast se kompania e ndërtimit Arlis falimenton para se të rindërtojë pallatin në rrugën e Dibrës në kryeqytet. Ky pallat u përfshi nga flakët pak ditë më parë dhe la disa familje pa strehë.
Në mbledhjen e sotme të Këshillit Bashkiak, një këshilltar e pyeti kryetaren në detyrë të Bashkisë, Anuela Ristani, për pasojat e mundshme të falimentimit të kompanisë. Ristani u përgjigj se Bashkia nuk ka marrëdhënie kontraktuale direkte me Arlis-in, por zbaton një politikë të caktuar. Në rast falimentimi, Bashkia kompensoi 50% të dëmeve strukturore dhe 100% të pjesës së brendshme të banesave, pajisjeve e sendeve të tjera.
"Nuk kemi një marrëdhënie kontraktuale me kompaninë, që unë mund të them sa shpejt apo si. Kemi një rregull apo një politikë me të cilën funksionojmë, që në rast të falimentimit të kompanive, ne kompensojmë 50% të dëmeve strukturore dhe pastaj 100% të pjesës së brendshme, të banesës, të pajisjeve dhe kështu me radhë", deklaroi Ristani.
Këshilli Bashkiak miratoi gjithashtu ndihmë financiare për banorët e pallatit. Familjet mbështeten me 40 mijë lekë në muaj. Kjo ndihmë monitorohet çdo muaj dhe ndërpritet sapo familjet sistemohen në banesat e rindërtuara.