Këshilli Bashkiak i Tiranës miratoi një vendim për dhënien e ndihmës financiare të menjëhershme për familjet dhe individët e prekura nga zjarri i 14 prillit 2026, i cili përfshiu një pallat në rrugën e Dibrës pranë Qendrës Spitalore Universitare Tiranë (QSUT), të njohur si kompleksi Arlis. Zjarri dëmtoi 71 apartamente.
Sipas projektvendimit, familjet përfituese do të marrin një ndihmë mujore në vlerë 40 mijë lekë, e cila do të vazhdojë deri në sistemimin përfundimtar në banesat e rikonstruktuara. Qëllimi kryesor është sigurimi i strehimit të përkohshëm për banorët e dëmtuar.
Përfituesit duhet të dorëzojnë pranë njësive administrative ku janë të regjistruar këto dokumente:
- Dokument identifikimi;
- Certifikatë familjare;
- Dokumente pronësie mbi banesën e dëmtuar;
- Deklaratë për vërtetësinë e të dhënave;
- Vërtetim nga Agjencia Shtetërore e Kadastrës që familjarët madhorë nuk zotërojnë banesë tjetër në të njëjtën njësi vendore.
Njësitë administrative verifikojnë dokumentacionin, hartojnë listën e përfituesve dhe e përcjellin te strukturat përkatëse për miratim dhe pagesa. Ndihma monitorohet çdo muaj dhe ndërpritet pas sistemimit përfundimtar. Në rast përfitimi të padrejtë, nisin procedurat për kthimin e shumave.
Efektet financiare mbështeten nga buxheti i Bashkisë së Tiranës për vitin 2026, në kuadër të programit për mbrojtjen nga zjarri dhe mbrojtjen civile. Drejtoria e Përgjithshme e Mbrojtjes Civile dhe Shërbimeve ndaj Qytetarit do të raportojë çdo tre muaj pranë Këshillit Bashkiak për listën e përfituesve dhe ecurinë e zbatimit.