Bashkimi Evropian po shqyrton strategji të reja për të zvogëluar ndikimin e vetos së shteteve anëtare gjatë proceseve negociuese. Ky diskutim vjen pas një periudhe bllokimi të vazhdueshëm në miratimin e paketës së 21-të të sanksioneve ndaj Rusisë, veprim ky i nxitur nga qëndrimi i Athinës zyrtare.
Sipas raportimeve të “Financial Times”, Greqia ka kërkuar përjashtime specifike nga sanksionet për anijet e kompanisë Dinagas. Këto anije operojnë me transportin e gazit natyror të lëngshëm (LNG) nga Rusia, një sektor që mbetet burim fitimi për kompanitë përkatëse. Kjo kërkesë është vendosur si kusht nga autoritetet greke për të dhënë dakordësinë e tyre mbi masat e tjera shtrënguese, të cilat synojnë sistemin financiar rus dhe të ardhurat nga eksporti i naftës.
Tre zyrtarë të BE-së konfirmuan se institucionet po punojnë për të gjetur një mekanizëm që kufizon përdorimin e kësaj taktike, e cila është shndërruar në një fenomen të zakonshëm në negociatat e sanksioneve. Shumë shtete anëtare po përdorin të drejtën e vetos për të mbrojtur kompanitë e tyre që vazhdojnë aktivitetet tregtare me Rusinë, duke vështirësuar konsensusin e përgjithshëm të unionit.