Analisti Baton Haxhiu, i ftuar në emisionin Opinion në Tv Klan, analizoi protestat që po zhvillohen prej ditësh në Tiranë dhe qytete të tjera të vendit. Ai theksoi se këto lëvizje nuk kanë një sfond ideologjik, por përfaqësojnë një bashkësi pakënaqësish të akumuluara.
Haxhiu vërejti se masiviteti i protestave buron nga zemërimi për çështje të ndryshme, duke i përshkruar ato si një "puzzle" kërkesash që përfshijnë administratën, universitetet, shtetin dhe emigracionin. Sipas tij, pjesëmarrësit shprehin kundërshti ndaj figurave të ndryshme politike, si Rama, Berisha apo edhe Trump, duke rrezikuar ndonjëherë humbjen e fokusit të kërkesave të tyre.
Megjithatë, analisti vlerësoi se roli kryesor i këtyre tubimeve është "vrasja e frikës" tek qytetarët, proces të cilin e konsideroi si një zhvillim pozitiv. Pavarësisht kësaj, Haxhiu kritikoi mënyrën e komunikimit të protestuesve, duke u shprehur se fjalimet e tyre janë "për të ardhur keq" dhe artikulohen me shumë mllef.