Kryeministri Edi Rama ka ndërhyrë në debatin e krijuar së fundmi në rrjetet sociale ndërmjet aktivistit Arben Kola dhe hoxhës Mustafa Tërniqi. Ky i fundit kishte publikuar një qëndrim ku kontestonte rolin e Kolës si organizator i protestave kundër investimit turistik në Zvërnec, duke vënë në dyshim përfaqësimin e tij në këto tubime.
Në kundërpërgjigjen e tij, Rama ka ironizuar përfshirjen e klerikut në protestë, duke e pyetur për motivet e tij. Kreu i qeverisë theksoi se detyra e një kleriku është predikimi i së vërtetës dhe paqtimi i shpirtrave, duke e këshilluar Tërniqin të mos shfrytëzojë hapësirat publike për të nxitur përçarje mes shqiptarëve.
"Po ti o hoxhë për llogari të kujt je futur në protestë, se vendi yt është në xhami?", theksoi Rama në postimin e tij. Ai u distancua nga mesazhet që nxisin tensione, duke vënë në dukje se shoqëria shqiptare nuk duhet të lejojë nxitjen e konflikteve. Kryeministri shtoi se qëndrimet e tij kritike ndaj disa protestuesve nuk lidhen me të drejtën për të protestuar, por me ndikimet që, sipas tij, po përpiqen të instalojnë ndasi.
Protestat në Tiranë kanë hyrë në ditën e 24-të. Debati publik mbi investimet dhe organizimin e nismave qytetare ka shënuar zhvillime të shpeshta, ku përplasjet mes figurave të përfshira në protesta janë bërë objekt i reagimeve politike.