Kryeministri Edi Rama ka reaguar përmes rrjeteve sociale ndaj deklaratave të njërit prej nismëtarëve të protestave, Arben Kola, lidhur me praninë e elementëve të huaj në tubimet që po zhvillohen prej 22 ditësh në Tiranë. Kola deklaroi se lëvizja qytetare po përballet me tentativa për dëmtim nga grupe të infiltruara, duke përmendur specifikisht grupe me origjinë nga Greqia dhe Serbia, si dhe ndikime me prapavijë fetare nga Turqia.
Në reagimin e tij, Rama ka ironizuar qëndrimin e Kolës, duke shkruar: “Ouuu….. Po ky vetë? Avash avash, të gjithë do dalin! Dhe flamingot do habiten me veten e tyre si ranë me kokë mes korbave e sorrave të shqiptarisë së rreme”.
Në rubrikën “Shënimet e Javës”, kryeministri theksoi se kauzat mjedisore, si ajo për Zvërnecin, duhet të mbështeten mbi fakte dhe jo mbi narrativa që, sipas tij, i shërbejnë interesave të tjera. Ai vlerësoi se protestat janë shndërruar në një arenë të një beteje të globalizuar politike që nuk ka lidhje me Nartën apo me interesat kombëtare. Sipas tij, Shqipëria nuk ka nevojë për “turma të rrëmbyera nga histeria e algoritmit”, por për gjykim të kthjellët.
Nga ana tjetër, Arben Kola u distancua nga incidentet e fundit, përfshirë atë me flamurin e Izraelit, duke theksuar se lëvizja nuk ka asnjë qëllim agresiv ndaj shteteve të tjera dhe se po punojnë për identifikimin e personave që po tentojnë t’i japin lëvizjes prapavijë fetare ose kombëtare.