Zyra e Bashkimit Evropian në Kosovë, pyetur për audio-incizimet e publikuara nga një mbledhje e Këshillit Prokurorial të Kosovës (KPK), nuk ka dhënë komente për regjistrimet e pretenduara. Në reagim zyrtar për RTK-në, BE-ja ka theksuar se pozicioni i saj mbi reformën e KPK-së është publik dhe i qëndrueshëm.
BE-ja ka bashkëpunuar me KPK-në gjatë këtij procesi dhe ka bërë thirrje të përsëritura që anëtarët të zbatojnë plotësisht reformën, të respektojnë procesin ligjor, të sigurojnë ligjshmërinë e vendimeve, të veprojnë me integritet dhe të ruajnë besimin publik në sistemin e drejtësisë. Bashkimi Evropian kërkon respekt të plotë të kornizës ligjore të Kosovës dhe nuk do t’i kërkojë asnjë institucioni të veprojë në kundërshtim me ligjin.
Zbatimi efektiv i Ligjit për KPK-në është thelbësor për të forcuar llogaridhënien, për të reduktuar praktikat korporatiste dhe për të siguruar që Këshilli të funksionojë në interesin publik, duke shërbyer sistemit të drejtësisë dhe qytetarëve të Kosovës, jo interesave individuale. Besueshmëria e sistemit prokurorial varet nga vendime të ligjshme, transparente dhe në përputhje me parimet e sundimit të ligjit dhe standardet evropiane.
BE-ja nënvizon se mbështetja për reformën është pjesë e përpjekjeve për të forcuar sundimin e ligjit dhe për të mbështetur përparimin e Kosovës drejt integrimit evropian. Çdo përpjekje për të vonuar, bllokuar ose minuar zbatimin e reformës është e papranueshme dhe rrezikon të dëmtojë besimin publik si dhe të ngadalësojë progresin e Kosovës në rrugën evropiane. BE-ja inkurajon aktorët që ndajnë këto vlera të kontribuojnë në mënyrë konstruktive në procesin e reformës.