Ursula von der Leyen, presidente e Komisionit Europian, nuk do të marrë pjesë në takimin inaugurues të Bordit të Paqes, të planifikuar më 19 shkurt në Uashington. Përmes zëdhënësit Anouar El Anouni, Komisioni Europian bëri të ditur se Brukseli ka ende pikëpyetje mbi statutin e bordit, veçanërisht për fushëveprimin, qeverisjen dhe përputhshmërinë me Kartën e OKB-së.
BE mbetet e gatshme për bashkëpunim me Shtetet e Bashkuara të Amerikës në zbatimin e një plani paqeje në Gazë.
Sipas New York Times, në takimin joformal në Uashington pritet të prezantohet një plan me miliarda dollarë për rindërtimin e Rripit të Gazës. SHBA dhe Emiratet e Bashkuara Arabe thuhet se janë gati të investojnë secila nga 1 miliard dollarë në këtë projekt.
Disa nga 20 vendet pjesëmarrëse pritet të ofrojnë mijëra trupa për krijimin e një force sigurie që do të vendoset në territor, duke shënuar një hap të ri në përpjekjet ndërkombëtare për stabilizimin e rajonit.
Përditësime
Kryeministri Edi Rama konfirmoi pjesëmarrjen në takimin e 19 shkurtit në Shtëpinë e Bardhë për themelimin e Bordit të Paqes. Shqipëria është shtet themelues dhe kontribuon me dinjitet, jo financiarisht. Ai mori ftesë direkte nga Presidenti i SHBA-së, sipas podkastit Flasim.