Bashkimi Europian do të marrë pjesë si vëzhguese në mbledhjen e parë të Këshillit të Paqes, strukturë e ngritur nga presidenti amerikan Donald Trump. Takimi zhvillohet të enjten, më 19 shkurt, në Washington.
Rolin e përfaqësimit do ta marrë Dubravka Šuica, komisionere për Mesdheun, e cila udhëton drejt kryeqytetit amerikan. Sipas njoftimit zyrtar, qëllimi i pjesëmarrjes është që të dëgjohet qëndrimi evropian mbi situatën në Gaza. Komisionerja do të marrë pjesë vetëm në pjesën e veçantë të mbledhjes kushtuar këtij çështjeje.
Zëdhënësi i BE-së, Guillaume Mercier, deklaroi se "Komisioni Evropian nuk bëhet anëtar i Këshillit të Paqes". Ai theksoi se pjesëmarrja si vëzhguese nuk nënkupton anëtarësim në këtë organ të ri.
Gjatë një konference për shtyp, zyrtarët e Brukselit nënvizuan se Bashkimi Europian ka pasur një sërë pyetjesh në lidhje me këtë strukturë. Këto pyetje lidhen veçanërisht me fushëveprimin e tij, mënyrën e qeverisjes dhe menaxhimit, si dhe përputhshmërinë me Kartën e Kombeve të Bashkuara.