Përfaqësuesja e Lartë e Bashkimit Evropian për Politikën e Jashtme dhe Sigurinë, Kaja Kallas, ka vlerësuar zgjedhjet në Kosovë si demokratike dhe gjithëpërfshirëse. Në një reagim në platformën "X", ajo theksoi se ky proces shënon fundin e një bllokade politike që ka zgjatur më shumë se një vit.
Kaja Kallas u ka bërë thirrje udhëheqësve politikë që të angazhohen në mënyrë konstruktive për të siguruar formimin e shpejtë të qeverisë. Sipas saj, ky është një hap vendimtar për stabilitetin e vendit.
Krahas formimit të institucioneve, zyrtarja e lartë evropiane nënvizoi se vazhdimi i dialogut ndërmjet Beogradit dhe Prishtinës, si dhe normalizimi i marrëdhënieve me Serbinë, mbeten kushte thelbësore për avancimin e Kosovës në rrugën drejt integrimit evropian.
Në të njëjtën linjë, komisionerja evropiane për Zgjerim, Marta Kos, u ka kërkuar aktorëve politikë në Kosovë që të gjejnë gjuhën e kompromisit dhe të bashkëpunojnë për të siguruar stabilitetin e nevojshëm institucional në periudhën paszgjedhore.