Kryetari i Partisë Demokratike të Kosovës (PDK), Bedri Hamza, ka ndërmarrë një fushatë sensibilizuese nëpërmjet rrjeteve sociale për të ftuar qytetarët në një protestë kundër vendimit të Dhomave të Specializuara në Hagë për ish-krerët e Ushtrisë Çlirimtare të Kosovës. Në thirrjen e tij, Hamza u ka kërkuar qytetarëve, studentëve dhe veteranëve që të bashkohen për të shprehur pakënaqësinë ndaj aktgjykimit për Hashim Thaçin, Kadri Veselin, Rexhep Selimin dhe Jakup Krasniqin.
Protesta është paralajmëruar të zhvillohet më 1 tetor, duke filluar nga ora 16:00, në sheshin “Skënderbeu” në Prishtinë. Hamza e ka shoqëruar ftesën e tij me mesazhin: “Bashkohu edhe ti! Le të bashkohemi kundër padrejtësisë!”.
Në një zhvillim paralel, platforma “Liria Ka Emër” ka publikuar një video-spot, përmes së cilës u bën thirrje qytetarëve për pjesëmarrje në mbrojtje të ish-krerëve të UÇK-së. Videoja përmban pamje nga protestat e organizuara përgjatë dhjetë ditëve të fundit si pjesë e mobilizimit për këtë çështje.