Kryetari i Partisë Demokratike të Kosovës (PDK), Bedri Hamza, ka marrë pjesë në protestën e organizuar në mbështetje të ish-krerëve të Ushtrisë Çlirimtare të Kosovës. Tubimi, i cili po mbahet në sheshin “Skënderbeu” në Prishtinë, ka shënuar natën e 13-të të zhvillimit të tij.
Hamza, i cili ishte i shoqëruar nga familja e tij, e bëri të ditur pjesëmarrjen përmes një postimi në rrjetet sociale. Ai shprehu mbështetjen e tij për qytetarët e mbledhur, duke e cilësuar UÇK-në si një vlerë madhore të vendit. Në mesazhin e tij, kreu i PDK-së përsëriti thirrjen: “Liri për çlirimtarët! Jo në emrin tim!”, që shërben si moto e kësaj proteste.
Protestat “Jo në emrin tim” janë organizuar si reagim ndaj zhvillimeve në Dhomat e Specializuara të Kosovës në Hagë, ku po gjykohen ish-krerët e UÇK-së.