Kryetari i PDK-së, Bedri Hamza, në emisionin “Debat Plus” ka paralajmëruar për përkeqësim të dukshëm të gjendjes ekonomike në Kosovë, duke e lidhur atë drejtpërdrejt me rënien e standardit të jetesës së qytetarëve.
“Disa indikatorë financiarë dhe makroekonomikë janë duke u përkeqësuar”, deklaroi Hamza, duke iu referuar vlerësimeve të institucioneve ndërkombëtare.
Ai shtoi se Fondi Monetar Ndërkombëtar, përmes misionit sipas nenit 4, ka evidentuar përkeqësim në balancat kryesore. “Deficiti i llogarisë rrjedhëse u përkeqësua, deficiti tregtar u përkeqësua”, tha ai.
Hamza e lidhi ngadalësimin ekonomik me bllokadat institucionale. “Rritja ekonomike ka rënë nën 4 për qind në tremujorin e fundit të vitit të kaluar”, u shpreh ai.
Ai theksoi edhe presionin e çmimeve mbi familjet. “Inflacioni ka vazhduar të rritet dhe në janar ishte 5.8 për qind në raport me periudhën paraprake. Po vazhdon rëndimi i standardit të jetesës”, tha Hamza.
Kritika e tij u fokusua edhe te politika fiskale. “Buxheti i ri nuk e ka reflektuar strukturën e ekonomisë së Kosovës”, deklaroi ai, duke lënë të kuptohet se qasja aktuale buxhetore nuk adreson realitetin ekonomik të qytetarëve dhe bizneseve.