**Bordi Ekzekutiv i Fondit Monetar Ndërkombëtar (FMN) publikoi të enjten raportin vjetor për Kosovën. Sipas këtij raporti, ekonomia ka vazhduar të rritet, por me ritëm më të ngadaltë pas një viti me bllokadë politike.
Rritja reale e **Bruto Produktit të Brendshëm (BPB) ra në 3.6% në vitin 2025, nga 4.6% në vitin 2024. Kjo erdhi nga rënia e eksporteve dhe dobësimi i kërkesës nga sektori privat, por u kompensua pjesërisht nga rritja e shpenzimeve dhe investimeve publike.
Inflacioni vazhdoi të rritet dhe arriti 5.7% në janar të vitit 2026, kryesisht për shkak të rritjes së çmimeve të ushqimit. FMN-ja parashikon inflacion 5.9% në vitin 2026, që gradualisht bie në 2% deri në vitin 2028.
Deficiti i llogarisë rrjedhëse u rrit në 9.2% të BPB-së për shkak të importeve të mëdha, sidomos të energjisë dhe ushqimit. Ky deficit parashikohet të tejkalojë 10% në 2026, ndër të tjera nga ndalja e përkohshme e një termocentrali me qymyr për renovim.
Rritja ekonomike parashikohet 3.3% për vitin 2026. FMN-ja thekson rreziqe si pasiguria politike, përfshirë zgjedhjen e presidentit, konfliktet në Lindjen e Mesme, tensionet në tregtinë globale dhe rritjen e çmimeve të produkteve bazë.
Në aspektin pozitiv, Plani i Rritjes i Bashkimit Evropian mund të ndikojë pozitivisht në rritje dhe punësim nëse zbatohet me kohë. Sektori financiar mbetet i qëndrueshëm, por kërkon forcim të mbikëqyrjes.
FMN-ja rekomandon kujdes në menaxhimin e parasë publike, të mos rrisen shumë shpenzimet buxhetore në 2026, si dhe reforma për rritje më të shpejtë, hapje vende pune dhe përfshirje më të madhe të grave në tregun e punës.
Përditësime
ASK raportoi inflacionin në 6.0% për shkurt 2026, nga 5.8% në janar 2026 dhe 4.7% në shtator 2025.
Rritja ekonomike në 2025 ishte 3.6%, nën projeksionet e BB (3.8%) dhe FMN (~4.0%). Kjo është performanca më e dobët e dekadës jashtë pandemisë, pas 2018 (3.4%).