Fondi Monetar Ndërkombëtar (FMN) ka publikuar deklaratën përmbyllëse pas vizitës zyrtare në Kosovë nga 3 deri më 13 shkurt 2026. Sipas raportit, ngërçi i zgjatur politik gjatë vitit 2025 ka ndikuar drejtpërdrejt në ngadalësimin e rritjes ekonomike, përshpejtimin e inflacionit dhe zgjerimin e deficitit të llogarisë së jashtme rrjedhëse.
Rritja ekonomike u ngadalësua në 3.5 për qind (vit mbi vit) deri në fund të tremujorit të tretë të vitit 2025, nga 4.75 për qind një vit më parë. Konsumi privat dhe investimet u dobësuan për shkak të ngadalësimit të kreditimit dhe stagnimit të të ardhurave reale. Rritja e importeve, veçanërisht të produkteve të energjisë, përkeqësoi bilancin tregtar dhe çoi deficitin e llogarisë së jashtme në 9.6 për qind të PBB-së, nga 8.4 për qind në 2024.
Inflacioni u përshpejtua në 5.25 për qind deri në dhjetor 2025, nga 1.1 për qind një vit më parë, i nxitur kryesisht nga rritja e çmimeve të ushqimeve. Ky ndikim u kompensua pjesërisht nga konsumi më i fortë qeveritar dhe investimet publike, të mbështetura nga përmirësimi i ekzekutimit të buxhetit.
Tregu i punës
Punësimi formal vazhdoi të zgjerohet, por rritja e pagave reale ngeci dhe papunësia mbeti e lartë në 10 për qind. Pjesëmarrja e ulët e vazhdueshme e fuqisë punëtore, veçanërisht midis grave, tregon dobësi në tregun e punës.
Ngërçi politik kufizoi zbatimin e agjendës së reformave në kuadër të Planit të Rritjes së BE-së dhe qasjen në financim të jashtëm. FMN vlerëson se ekonomia tregoi qëndrueshmëri përballë krizës politike, ndërsa perspektiva mbetet pozitive, por me rreziqe negative.