Sot, më 24 mars 2026, bëhen 27 vjet nga djegia e Çarshisë së vjetër të Gjakovës, ngjarje e ndodhur natën e 24 marsit 1999. Kjo ndodhi si hakmarrje e pushtetit serb ndaj popullsisë civile pas fillimit të bombardimeve të NATO-s kundër caqeve serbe.
Atë natë u ndez flaka e gjithë çarshia, ndërsa u vranë dhjetëra civilë. Gjatë 78 ditëve të bombardimeve, në Gjakovë dhe në të gjithë Kosovën vazhduan vrasjet, dhunimet, djegiet dhe dëbimet e popullsisë shqiptare.
Çarshia e Madhe, siç njihet ndryshe, ishte një kompleks monumental me rëndësi të madhe jo vetëm në Kosovë, por edhe jashtë saj. Ajo shërbente si qendër pazari dhe zanatesh, si dhe si vend kulturor, historik e fetar.
Në çarshi ushtroheshin zeje të ndryshme:
- armëtarët,
- argjendarët,
- kazangjinjtë,
- lëkurëpunuesit,
- rrobaqepësit,
- zhgunaxhinjtë,
- qëndistarët,
- zdrukthëtarët,
- kazazët,
- qeleshepunuesit,
- gërçakxhinjtë,
- saraçët,
- opingaxhinjtë,
- cergaxhinjtë,
- çibukxhinjtë.
Gjatë ngjarjes u shkatërruan të gjitha përmendoret kulturore-historike brenda çarshisë. Pas luftës, ajo u rindërtua falë ndihmës së organizatave ndërkombëtare.