Kosova shënon sot 27-vjetorin e Ditës së Çlirimit, datë që shënoi fundin e fushatës ushtarake të NATO-s dhe fillimin e procesit të paqeruajtjes. Më 12 qershor 1999, pas ndërprerjes së sulmeve ajrore, forcat e Aleancës filluan hyrjen në territorin e Kosovës, duke u pasuar nga miratimi i Rezolutës 1244 të Këshillit të Sigurimit të Kombeve të Bashkuara.
Fushata ushtarake dhe Marrëveshja e Kumanovës
Fushata ajrore e NATO-s, e cila nisi më 24 mars 1999, zgjati 78 ditë. Gjatë kësaj periudhe, aeroplanët nga 13 shtete anëtare kryen 38 mijë e 400 fluturime, duke hedhur 26 mijë e 614 projektilë mbi caqet ushtarake dhe policore serbe. Ndërhyrja erdhi si përgjigje ndaj spastrimit etnik, që shkaktoi vrasjen e mbi 10 mijë shqiptarëve. Pas pranimit të parimeve të G-8-shes, u nënshkrua Marrëveshja Tekniko-Ushtarake e Kumanovës, e cila detyroi forcat e ish-RFJ-së të tërhiqeshin nga Kosova.
Hyrja e trupave dhe incidenti në aeroport
Vendosja e forcave të KFOR-it më 12 qershor 1999 përkon edhe me momentin e tensionit në Aeroportin e Prishtinës, ku trupat ruse kishin hyrë befasisht. Situata u tejkalua pas bllokadës diplomatike dhe ajrore të udhëhequr nga Washingtoni, duke penguar përforcimet ruse. Ushtarët e parë të NATO-s që hynë në Kosovë ishin forcat speciale të Norvegjisë dhe Shërbimit Special Ajror Britanik (SAS).
Në këto dy dekada e gjysmë, Kosova ka konsoliduar praninë ndërkombëtare, ku kanë kontribuar rreth 500 mijë pjesëtarë të forcave paqeruajtëse nga vende të ndryshme të botës, duke garantuar sigurinë e popullatës dhe kthimin e mbi 1 milion të shpërngulurve në trojet e tyre.