Albin Kurti, kryeministër i Kosovës, ka përkujtuar 27-vjetorin e ditës së parë të fushatës së bombardimeve të NATO-s mbi Jugosllavi.
Në një postim në rrjetin social Facebook, Kurti shkruan se më 24 mars 1999 forcat ajrore të Organizatës së Traktatit të Atlantikut të Veriut (NATO), të prira nga Shtetet e Bashkuara të Amerikës, nisën Operacionin Forca Aleate. Këto bombardime goditën forcat ushtarake dhe policore të Jugosllavisë, si dhe infrastrukturën e tyre.
Sipas Kurtit, kjo fushatë erdhi më shumë se një vit pas fillimit të luftës në Kosovë dhe një ditë pasi Serbia, e drejtuar nga Sllobodan Millosheviqi, nuk pranoi asnjë ultimatum për të ndaluar operacionet kundër popullsisë civile, për të tërhequr forcat nga Kosova dhe për të pranuar ofertat diplomatike.
Kurti thekson se ndërhyrja e NATO-s, pas luftës së Ushtrisë Çlirimtare të Kosovës, ndaloi gjenocidin, spastrimin etnik dhe krimet e tjera shtetërore të Serbisë ndaj shqiptarëve. Bombardimet zgjasën 78 ditë, deri më 10 qershor 1999, kur me Marrëveshjen në Kumanovë përfundoi lufta. Gjatë kësaj periudhe, forcat serbe intensifikuan spastrimin etnik, duke dëbuar mbi 860 mijë shqiptarë, duke vrarë mijëra civilë dhe lënë të zhdukur shumë persona.
Ndërhyrja e NATO-s dhe hyrja e trupave të saj në Kosovë hapën rrugën për lirinë, demokracinë dhe shtetndërtimin e Republikës së Kosovës. Kurti rikujton deklaratën e atëhershëm presidentit amerikan Bill Clinton, i cili paralajmëroi ndërhyrjen ushtarake për të ndaluar shtypjen.
Ai shpreh mirënjohje për ndihmën e jashtëzakonshme të të gjitha vendeve të NATO-s dhe nderon veçanërisht rolin e SHBA-së në rrugën e Kosovës drejt lirisë me demokraci dhe integrim.