Sot mbushen 27 vjet nga fillimi i sulmeve ajrore të NATO-s kundër caqeve ushtarake dhe policore të Serbisë dhe Mali i Zi. Sulmet nisën në orën 19:45, kur avionët e NATO-s lëshuan bombat e para kundër pozicioneve strategjike të ushtrisë së ish-Jugosllavisë, që përfshinte dy republikat e saj, Serbinë dhe Mali i Zi.
Urdhrin për nisjen e fushatës bombarduese e dha presidenti i Shteteve të Bashkuara, Bill Clinton. Ai mbajti një fjalim para popullit amerikan, duke njoftuar se kishte urdhëruar Aleancën Atlantike të fillonte operacionin ushtarak si mundësi e vetme për përfundimin e luftimeve në Kosovë. Në fjalimin e tij, Clinton tha: "Ne dhe Aleanca e NATO-s kemi bërë të gjitha përpjekjet për një zgjidhje paqësore të konfliktit në Kosovë. Por presidenti Millosheviç, i cili në të kaluarën e afërt shkaktoi luftëra të tmerrshme në Kroaci e në Bosnjë, ka vendosur në favor të agresionit në vend se të paqes".
Kjo ishte ndërhyrja e parë ushtarike e NATO-s që nga formimi i saj, e cila njihet edhe si ndërhyrje historike. Fushata ajrore kishte për qëllim ndalimin e dhunës dhe spastrimit etnik në Kosovë, pas dështimit të përpjekjeve diplomatike.
Gjatë këtij periodi, mijëra civilë shqiptarë të Kosovës u dëbuan nga shtëpitë e tyre, ndërsa shumë të tjerë u vranë ose u zhdukën si pasojë e operacioneve të forcave serbe. Ndërhyrja e NATO-s u pasua me vendosjen e administratës ndërkombëtare në Kosovë dhe praninë e forcave paqeruajtëse, duke shënuar një kthesë të rëndësishme.
Përditësime
Sulmet ajrore të NATO-s vazhduan deri më 9 qershor 1999. Atë ditë u nënshkrua Marrëveshja e Kumanovës, që shënoi kapitullimin e forcave serbe.
Më 11 qershor, forcat serbe nisën tërheqjen nga Kosova.