Presidenti i Republikës, Bajram Begaj, ka reaguar më 24 mars 2026 për 27-vjetorin e ndërhyrjes ushtarake të NATO-s kundër regjimit të Sllobodan Millosheviçit. Në një postim në platformën X, ai thekson se kjo fushatë përfundoi me sukses, duke sjellë lirinë në Kosovë dhe paqen në rajon.
Në mesazhin e tij, Presidenti Begaj shkruan: «Sot shënohet 27-vjetori i ndërhyrjes ushtarake të NATO-s kundër regjimit shtypës të Millosheviçit—një fushatë që përfundoi me sukses, duke sjellë lirinë në Kosovë dhe paqen që gëzojmë në të gjithë rajonin sot. Shqipëria mbetet, sot dhe gjithmonë, thellësisht mirënjohëse ndaj Shteteve të Bashkuara të Amerikës dhe aleatëve të NATO-s».
Ndërhyrja ushtarake nisi më 24 mars 1999 dhe zgjati 78 ditë, deri më 10 qershor 1999. Ajo filloi pas dështimit të përpjekjeve për zgjidhje paqësore dhe u autorizua nga Sekretari i Përgjithshëm i NATO-s, Javier Solana. Presidenti amerikan Bill Clinton dha urdhrin për nisjen e sulmeve ajrore kundër pozicioneve të ushtrisë jugosllave.
Fushata përbënte herën e parë që NATO përdorte forcën ushtarake pa miratimin e Këshillit të Sigurimit të Kombeve të Bashkuara. Bombardimet u ndërprenë pas nënshkrimit të Marrëveshjes së Kumanovës, me të cilën forcat jugosllave u tërhoqën nga Kosova dhe u krijua forca paqeruajtëse ndërkombëtare e udhëhequr nga NATO. Kjo u shoqërua me miratimin e Rezolutës 1244 të Këshillit të Sigurimit.
Ministri i Jashtëm Ferit Hoxha ka theksuar se ky ishte një moment përcaktues, kur dinjiteti njerëzor mbizotëroi mbi frikën dhe veprimi i përbashkët mbrojti jetët e pafajshme.