Presidenti i Shqipërisë, Bajram Begaj, ka përçuar një mesazh urimi për 27-vjetorin e Ditës së Çlirimit të Kosovës. Në një reagim në rrjetet sociale, kreu i shtetit vlerësoi kontributin e jashtëzakonshëm për lirinë e vendit.
"Urime Ditën e Çlirimit, Kosovë! Liria e Kosovës erdhi në sajë të sakrificës sublime të mijëra burrave dhe grave, luftës heroike të Ushtrisë Çlirimtare të Kosovës dhe vendosmërisë së aleatëve tanë strategjikë", shkroi Presidenti Begaj.
Gjatë mesazhit të tij, Presidenti shprehu mirënjohje të veçantë për mbështetjen e NATO-s, duke theksuar rolin e saj në një nga momentet më vendimtare të historisë. "Faleminderit NATO-s që qëndroi në anën e drejtësisë, lirisë dhe dinjitetit njerëzor në një nga momentet më vendimtare të historisë së kombit tonë", shtoi ai.
Kreu i shtetit nderoi gjithashtu luftëtarët e UÇK-së, dëshmorët e lirisë dhe të gjithë ata që kontribuan për arritjen e kësaj dite, duke e përmbyllur reagimin me thirrjen: "Lavdi të përjetshme dëshmorëve të lirisë".
Data 12 qershor shënon përfundimin e luftës në Kosovë dhe hyrjen e forcave paqeruajtëse të KFOR-it në territor, pas ndërhyrjes së NATO-s në vitin 1999.