Bekim Jashari, përfaqësues i familjes Jashari dhe ish-kryetar i Komunës së Skënderajt, ka dalë me një reagim në Facebook lidhur me gjykimin në Gjykatën Speciale të Hagës. Reagimi vjen në kohën kur kanë filluar fjalët përfundimtare të palëve në çështjen e ish-krerëve të Ushtrisë Çlirimtare të Kosovës (UÇK).
Në postimin e tij, Jashari shpreh shqetësim për pretendimet e Zyrës së Prokurorit të Specializuar (ZPS) rreth Luftës Çlirimtare të Kosovës. Ai vlerëson se të gjitha akuzat përbëjnë vazhdimësi të propagandës serbe, e cila ka depërtuar edhe në këtë gjykatë.
Jashari nënvizon se vendimet gjyqësore duhet të mbështeten në fakte dhe argumente, të cilat janë në anën e popullit që kërkoi liri dhe krijoi UÇK-në. Ai rikujton se UÇK-ja fitoi mbështetje ndërkombëtare dhe, bashkë me NATO-n, solli lirinë në Kosovë.
Ai përshkruan luftën e UÇK-së si të drejtë dhe në përputhje me ligjet ndërkombëtare të luftës. Sipas tij, bota demokratike ka dëshmuar se UÇK-ja është "e pastër si loti" dhe aleate kryesore e NATO-s për vendosjen e paqes në Ballkan, çka vërteton se Kosova nuk ishte agresori.
Jashari akuzon Serbinë si palën e vetme që kryen krime makabre në Kosovë, mes të cilave:
• Vrasja e më shumë se 10.000 shqiptarëve;
• Mbi 100 masakra ndaj civilëve, përfshirë fëmijë dhe pleq;
• Dëbimi me dhunë i rreth 1 milion njerëzve;
• Dhuna seksuale ndaj mbi 20.000 grave dhe vajzave.
Ai përfundon se drejtësia ndërkombëtare nuk duhet të barazojë viktimën me agresorin dhe se gjykata nuk mund të dënojë askënd në emër të këtij populli, pasi UÇK-ja është vetë populli.
Përditësime
Prokuroria e Gjykatës Speciale të Hagës kërkoi të hënën dënim me të paktën 45 vjet burg për ish-krerët e UÇK-së. Gjykimi ka hyrë në fazën finale.