Në seancën fillestare të mbajtur të mërkurën në Gjykatën Themelore në Prishtinë, Bekim Sylejmani u deklarua i pafajshëm për akuzën se kishte kanosur ish-presidentes së Kosovës, Vjosa Osmani. Pas leximit të aktakuzës nga prokurori Besart Mustafa, Sylejmani tha: “Nuk e pranoj fajësinë”.
Sipas aktakuzës së ngritur më 3 shtator 2026 nga Prokuroria Themelore në Prishtinë, Sylejmani akuzohet se më 10 qershor 2026, me qëllim frikësimi, e kanosi seriozisht Osmanin përmes një postimi në Facebook. Mesazhi i cituar në aktakuzë ishte: “Mas more se ajo që e shet venin pak esht plumbi per te, rnoft Albini me popullin”. Ai ngarkohet me veprën penale të kanosjes, sipas nenit 181, paragrafi 2, të Kodit Penal.
Gjyqtari i çështjes, Bujar Ahmeti, e njoftoi Sylejmanin se mbrojtja me avokat nuk është e detyrueshme në këtë rast. I akuzuari zgjodhi ta vazhdojë seancën pa avokat.
Avokati Artan Qerkini, përfaqësues i të dëmtuarës, deklaroi se i bashkohet ndjekjes penale kundër të akuzuarit. Sa i përket kërkesës pasurore-juridike, ai tha se nuk do të paraqitet kërkesë për dëmshpërblim, duke marrë parasysh gjendjen e dobët materiale të Sylejmanit.
Pas deklarimit të pafajësisë, gjykata e njoftoi të akuzuarin se ka 30 ditë për të paraqitur kundërshtimet ndaj provave dhe kërkesën për hedhjen e aktakuzës. Prokurori Mustafa tha se do t’ia dorëzojë shkresat e çështjes brenda ditës.
Sylejmani konsiderohet i pafajshëm derisa fajësia e tij të vërtetohet me vendim gjyqësor të formës së prerë.