Trafiku ajror në Belgjikë është pezulluar për shkak të një greve të papritur të kontrollorëve të trafikut ajror. Sipas kompanisë belge të kontrollit ajror Skeyes, fluturimet janë anuluar dhe operacionet pritet të rifillojnë normalisht në orën 21:00.
Shkak i kësaj proteste është kundërshtimi i punonjësve ndaj kushteve të planifikuara për vënien në funksion të kullës së re dixhitale të kontrollit në Namur. Kjo qendër e re, e cila parashikohet të jetë funksionale nga viti 2027, synon të centralizojë operacionet e kullave të kontrollit për aeroportet e Liezhit dhe Sharleroit.
Gjatë kohës së grevës, autoritetet kanë njoftuar se përjashtohen nga ndalimi:
- Fluturimet qeveritare
- Misionet mjekësore
- Operacionet e kërkim-shpëtimit dhe ato të emergjencës
Udhëtarët janë njoftuar të shmangin paraqitjen në aeroport për të shmangur grumbullimet. Kjo ndërprerje pason një grevë të zhvilluar gjatë natës, e cila shkaktoi anulime dhe vonesa të shumta për fluturimet e pasagjerëve dhe ato të transportit të mallrave në të gjithë vendin.