Ish-kryeministri izraelit, Naftali Bennett, ka shprehur kritika të ashpra ndaj menaxhimit të qeverisë aktuale të udhëhequr nga Benjamin Netanyahu. Gjatë fjalës së tij në Konferencën për Konceptin e Sigurisë së Izraelit në Tel Aviv, ai deklaroi se pozita e Izraelit në arenën ndërkombëtare ka pësuar një rënie historike.
"Kemi humbur SHBA-në, kemi humbur botën", u shpreh Bennett, duke theksuar se vendi ndodhet në pikën më të ulët që nga themelimi i tij. Përveç vlerësimit për izolimin diplomatik, ish-kryeministri akuzoi qeverinë për paaftësi në arritjen e objektivave ushtarake. Sipas tij, administrata aktuale nuk ka arritur të sigurojë fitore në frontet e luftës, duke përmendur specifikisht situatën në Gaza dhe Liban.
Bennett argumentoi gjithashtu se Izraelit i mungon një institucion efektiv për të kundërshtuar fushatat e ndikimit të jashtëm që synojnë shtetin. Këto deklarata vijnë në një kohë kur Bennett po forcon pozitat e tij si një rival politik i Netanyahut përpara zgjedhjeve parlamentare. Qeveria e Izraelit vazhdon të përballet me kritika ndërkombëtare në rritje për shkak të luftës në Rripin e Gazës, ku që nga tetori i vitit 2023 është regjistruar një numër i lartë i viktimave mes civilëve palestinezë dhe zhvendosje masive të popullsisë.