Berat Asllani, 41 vjeç, ka vdekur pesë ditë pas një aksidenti trafiku në rrugën “Ahmet Selaci”, në Bajr të Mitrovicës. Në aksidentin me motoçikletë, ai u dërgua pa vetëdije në Spitalin e Mitrovicës.
Pas ekzaminimeve mjekësore, u konstatua se Asllani kishte pësuar gjakderdhje në tru. Pas trajtimit fillestar në Spitalin e Mitrovicës, ai u transferua urgjentisht në Qendrën Klinike Universitare të Kosovës (QKUK), ku vazhdoi trajtimin. Pas pesë ditësh, ai ndërroi jetë.
Lajmin për vdekjen e tij e bëri të ditur vëllai, aktori Agan Asllani, përmes një njoftimi në rrjetet sociale. Në mesazhin e publikuar, Agan Asllani njoftoi familjarët, miqtë dhe dashamirët për ndarjen nga jeta të vëllait të tij, Berat Asllanit.
Familja ka bërë të ditur se do të njoftojë më vonë për datën dhe ceremoninë e varrimit.