Një 30-vjeçar ka humbur jetën në një aksident trafiku të ndodhur mbrëmjen e 18 shkurtit 2026 në fshatin Kutllovc të Mitrovicës.
Rreth orës 21:37, policia në Mitrovicë ka pranuar informacion për aksidentin. Sipas zëdhënësit të policisë për rajonin e Mitrovicës, Avni Zahiti, si pasojë e lëndimeve të marra ka vdekur një person mashkull rreth 31-vjeçar. Hetuesit policorë, në koordinim me prokurorin, po zhvillojnë hetime për sqarimin e rrethanave të rastit.
Viktima është dërguar rreth orës 22:20 në Shërbimin Emergjent të Spitalit të Përgjithshëm "Dr. Sami Haxhibeqiri" në Mitrovicë, pa shenja jete. Zëdhënësi i spitalit, Shpend Fazliu, konfirmoi se, përkundër masave reanimatore të marra në vendngjarje dhe në spital, ekipi mjekësor ka konstatuar vdekjen e të aksidentuarit.
Policia nuk ka dhënë ende detaje të tjera për shkaqet e aksidentit.