Sali Berisha, kryetar i Partisë Demokratike, mbajti më 14 janar 2026 një konferencë për shtyp ku denoncoi atë që e quajti "skandalin e Duranës" ose projektin Durana në Xhafzotaj.
Sipas Berishës, Armand Frangu, baxhanaku i kryeministrit Edi Rama, shpërndante informacione për tenderat qeveritare para publikimit, kundrejt pagesash. Aksesi varej nga tarifa: deri në 5 mijë euro në vit për statusin "gold", ndërsa për "platinium" kërkoheshin negociata me përfaqësuesin e tij, Ermal Beqiri.
Berisha e krahasoi projektin me investimin prej 130 milionë eurosh në Sharrë për djegësin e plehrave, ku nuk ka asnjë gjurmë pune. Në Xhafzotaj, sipas tij, gjenden vetëm livadhet e Fatmir Troplinit, pa shenja të Troplanës ose Duranës. Me këtë etiketë, sipas tij, janë vjedhur qindra milionë euro taksa, pronë e qytetarëve.
Mbi 50 kompani, të përzgjedhura një nga një, kishin paguar taksat jo në tatime, por sarajve të Surrrelit, Armand Frangut, Linda Ramës dhe Edi Ramës, sipas deklaratës së tij.
Projekti nuk kishte filluar me tendera, por me organizimin e infrastrukturës së vendimeve. Ermal Beqiri, i quajtur nga Berisha alias i Armand Frangut, kishte krijuar shoqatën ACTI (Këshilli Shqiptar për Teknologjinë dhe Inovacionin). Qëllimi zyrtar ishte bashkimi i profesionistëve të IT-së, ndërsa qëllimi real, sipas akuzave, krijimi i një monopoli ku 50 kompani anëtare drejtonin projektet qeveritare në origjinë.