Sali Berisha, kryetar i Partisë Demokratike, dhe deputetja Albana Vokshi ndodhen në Strasburg të Francës, në selinë e Asamblesë Parlamentare të Këshillit të Europës.
Në një videomesazh të shpërndarë në rrjetet sociale, Berisha deklaroi se opozita vazhdon betejën kundër narkoshtetit dhe Ramaduros. Mesazhi i tij ishte: "Mirëmëngjes, miq! Një përshëndetje të përzemërt nga selia e Asamblesë Parlamentare të Këshillit të Europës, ku jemi sot këtu bashkë me Albana Vokshin, për të vazhduar betejën tonë kundër narkoshtetit dhe Ramaduros. Ditë të mbarë të gjithëve!"
Kjo vizitë vjen dy ditë pas protestës kombëtare të opozitës në bulevardin para Kryeministrisë dhe Kuvendit, e cila u shoqërua me përplasje mes demonstruesve dhe Policisë.
Më herët, Berisha kishte postuar një video nga protesta e së shtunës, ku theksonte se "Drita e Uraganit ngrohu zemrat e shqiptarëve dhe tmerroi shpirtin katran të Ramaduros dhe narko-qeverisë së tij".
Përditësime
Sali Berisha mbërriti privatisht në Strasburg dhe nuk figuron në delegacionin zyrtar shqiptar në Asamblenë Parlamentare të Këshillit të Europës. Dokumenti i firmosur nga Niko Peleshi konfirmon se delegacioni përfshin Oltën Xhaçka, Ogertën Manastirliu, Iris Luarasin dhe Albanën Vokshi. Vokshi qëndroi jashtë seancës për ta lejuar Berishën të përdorë foltoren e saj personale në holl.