Gjatë protestës së Partisë Demokratike në Tiranë më 22 mars 2026, kreu i saj, Sali Berisha, u lëndua nga një spray në sy. Ai u shfaq me sytë e skuqur mes protestuesve, pati probleme me frymëmarrjen, u largua në drejtim të banesës së tij dhe u rikthye me maskë kundër gazit lotsjellës.
Deputetët Flamur Noka dhe Luçiano Boçi u përplasën me efektivët e policisë, duke i fajësuar për lëndimin e Berishës. Boçi u shpreh: «Si e mban këtë uniformë. Burracakë, legena». Noka deklaroi: «Keni marrë urdhër, keni goditur direkt në sy liderin e opozitës. Jo të gjithë ju, po një nga ju. E kemi të filmuar, do e paguani. Do ta paguani shtrenjtë. Nuk jeni shërbëtorë të ligjit, jeni mercenarë të krimit të organizuar».
Protesta përshkallëzoi pranë Xhamisë së Namazgjasë, ku protestuesit hodhën molotovë dhe fishekzjarrë drejt Kryeministrisë, dy ministrive dhe selisë së Partisë Socialiste. Zona u mbush me tym.
Dy efektivë të Forcës së Posaçme Shqiponja u lënduan nga molotovët dhe u transportuan në Spitalin Ushtarak. Policia iu përgjigj me gaz lotsjellës dhe presion uji për shpërndarjen e turmës. Autoritetet nisën shoqërimet e para të protestuesve.