Sali Berisha, kryetari i Partisë Demokratike, ka reaguar për vendimin e SHBA-së për pezullimin e vizave emigruese për 75 vende, mes të cilave është edhe Shqipëria. Ky vendim hyn në fuqi më 21 janar 2026.
Berisha deklaroi se përgjigjen më të qartë e ka dhënë Ambasada Amerikane në reagimin e saj të djeshëm. “Mendoj se përgjigjen kësaj pyetje ia dha qartësisht ambasada e SHBA. Dhe unë nuk mund të shtoj as të heq ndonjë gjë nga shpjegimi i djeshëm i ambasadës”, u shpreh ai.
Sipas Ambasadës Amerikane, aplikantët për vizë emigruese nga vendet e prekura mund të dorëzojnë aplikimet dhe të marrin pjesë në intervista. Departamenti i Shtetit do të vazhdojë të caktojë takime, por asnjë vizë emigruese nuk do të lëshohet gjatë periudhës së pezullimit.
Ky pezullim zbatohet vetëm për vizat emigruese dhe jo për ato turistike. Vizat emigruese aktuale të vlefshme nuk janë hequr si pjesë e këtij udhëzimi.
Përjashtim bëjnë shtetasit me dyshtetësi që aplikojnë me një pasaportë të vlefshme të një vendi jo të përfshirë në listën e 75 vendeve.
Ambasada Amerikane sqaron se Departamenti i Shtetit po kryen një rishikim të plotë të politikave, rregulloreve dhe udhëzimeve.