Sali Berisha, kryetar i PD-së, foli në një takim në selinë e partisë lidhur me ngritjen e ndërmarrjes shtetërore të naftës. Ai akuzoi kryeministrin Edi Rama se ia ka dorëzuar drejtimin e saj Ron Yeffet-it, tregtarit të armëve të lidhur ngushtë me Ardi Veliun dhe Ramën.
Sipas Berishës, ndërmarrja nuk do të menaxhohet vërtet nga Yeffet, por nga vetë Rama, i cili do ta marrë për vete dhe pas një kohe do ta falimentojë si Air Albania. Berisha e krahasoi Yeffet-in me Sinan Idrizi, duke thënë se Rama i mori përsipër borxhet Idrizit.
Në deklaratën e tij, Berisha tha: “Më thonë tani që Rama ka zgjedhur Ron Yeffet-in. Ron Yeffet është tregtari i armëve i Edi Ramës bashkë me Ardi Veliun. [...] Këtij do t’ia dorëzojë ndërmarrjen shtetërore të naftës, do e marrë për vete Edi Rama dhe një ditë do ta falimentojë si Air Albania.”
Berisha theksoi se PD ka përgatitur projektligjet dhe amendamentet për t’i dërguar në Parlament. Këto synojnë ndërhyrje në taksën e qarkullimit dhe akcizë për shkak të krizës energjie të krijuar nga lufta në Lindjen e Mesme, e cila nuk mund të parashikohet duke marrë parasysh gjeografinë e naftës.