Në raportin e publikuar në qershor, BERZH vëren se ekonomia shqiptare mbetet e ndikuar nga presioni inflacionist, për shkak të peshës së lartë të produkteve ushqimore në shportën e konsumatorit, e cila zë rreth 40%. Megjithatë, zhvlerësimi i euros ka ndihmuar në zbutjen e çmimeve, ndërsa vendi pritet të përfitojë nga flukset e shtuara të turistëve.
Rritja ekonomike e vendit u ngadalësua në 3.8% gjatë vitit 2025, krahasuar me 4.0% që u regjistrua në vitin 2024. Sektorët që nxitën rritjen ishin administrata publike, pasuritë e paluajtshme, ndërtimi dhe teknologjia e informacionit (TIK), ndërsa industria dhe bujqësia shfaqën tkurrje, të ndikuara nga forcimi i lekut dhe kërkesa e dobët e jashtme.
Sipas të dhënave, deficiti i llogarisë korrente është ngushtuar në 0.7% të PBB-së, mbështetur nga performanca e turizmit dhe remitancat. Inflacioni, në nivelin 2.6% gjatë muajit mars, ka qëndruar brenda objektivit të bankës qendrore. Ndërkohë, borxhi publik ka rënë në 53% të PBB-së në fund të vitit 2025, kurse deficiti fiskal u rrit në 1.8%.
Për vitin 2027, BERZH parashikon një rritje ekonomike prej 3.5%, e cila pritet të mbështetet nga investimet dhe reformat në procesin e anëtarësimit në Bashkimin Europian. Institucioni paralajmëron se rreziqet si ndryshimet klimatike, luhatjet e çmimeve të energjisë dhe konkurrueshmëria e jashtme mbeten faktorë sfidues për vendin.