Futbollisti Besfort Zeneli ka folur publikisht për reagimet e ashpra që ka pranuar pas vendimit për ta përfaqësuar Suedinë në nivel ndërkombëtar, pavarësisht prejardhjes së tij nga Kosova. Në deklarimet e tij, të përcjella nga mediumi sudinfo.be, mesfushori 23-vjeçar ka konfirmuar se është përballur me një numër të lartë mesazhesh kërcënuese dhe negative pas kësaj zgjedhjeje.
Para se t'i bashkohej përfaqësueses së Suedisë, Zeneli kishte regjistruar gjashtë paraqitje me grupmoshat e Kosovës, përkatësisht me kombëtaren U21. Aktualisht, ai është pjesë e klubit belg Royale Union, ku u transferua në janar të këtij viti nga skuadra suedeze e Elfsborgut, në një marrëveshje që kap vlerën e 3.8 milionë eurove.
Besfort Zeneli është vëllai i vogël i ish-futbollistit të Kosovës, Arbër Zenelit. Gjatë rrëfimit të tij, ai ka theksuar gjithashtu ndikimin e familjes në zhvillimin e tij profesional si futbollist në kampionatin suedez.