Në Institut Français të Parisit u zhvillua një mbrëmje homazhi për 90-vjetorin e lindjes së Ismail Kadaresë, e organizuar nga Akademia e Shkencave Morale dhe Politike, Akademia Franceze dhe Ambasada e Shqipërisë në Francë.
Besiana Kadare, vajza e shkrimtarit, foli në emër të familjes, duke shprehur emocionin për pjesëmarrjen në këtë event. Ajo theksoi se largimi i babait të saj ka lënë një boshllëk të pafund, por ky boshllëk është i banuar nga një mendim që nuk u shua me të. Veprat e tij migrojnë te lexuesit, hyjnë brenda nesh, rrënjosen dhe ndryshojnë mënyrën e të menduarit për botën, lirinë dhe pushtetin.
Besiana Kadare përmendi rolin e Francës si atdhe i dytë, që i priti familjen në 1990, kur u larguan nga Shqipëria komuniste, duke i ofruar babait hapësirë lirie për të shkruar. Ajo e quajti Institut Français-in shtëpinë e tij, ku mendimi francez mblidhet, përcillet dhe përballet me vetveten, dhe vlerat e së cilës Kadare i mishëroi në veprën e tij.
Në ceremoni morën pjesë miq e njohës të veprës së Kadaresë:
- Angelin Preljocaj
- Jacques Attali
- Tedi Papavrami
- Éric Faye
- Jean-Paul Champseix
- Mireille Clapot
Fragmente nga romanet “Prilli i thyer” dhe “Ura me tri harqe” u recituan nga aktorët shqiptarë Simon Pitaqaj dhe Aphrodite de Lorraine, duke bërë të jehonë gjuhën shqipe në këtë tempull të kulturës franceze.
Besiana Kadare ndau fjalimin në rrjetet sociale, duke theksuar se përtej kornizës institucionale, miqësia gjeti vendin e saj. Ajo rrëfeu se të ishe vajza e Ismail Kadaresë do të thoshte të rriteshe mes fjalish të mbetura pezull, dorëshkrimesh të hapura dhe heshtjeve të dendura.