Të premten, 3 prillit 2026, besimtarët katolikë në Tiranë kryen ritualin e Udhës së Kryqit në sheshin Nënë Tereza. Ky rit, i njohur si E Premtja e Madhe, përkujton udhën e Jezu Krishtit drejt kryqëzimit përmes 14 ndalesave simbolike.
Ritualin e udhëhoqi Imzot Arjan Dodaj, Arqipeshkvi i Dioqezës Tiranë-Durrës. Në fjalën e tij, ai u shpreh se kjo ditë thërret për të ndjekur udhën e Krishtit. "Jemi mbledhur në këtë ditë për të përkujtuar se Zoti na shoqëron në gjitha situatat e jetës sonë. Aty ku kemi qarë ne, Jezusi ka ardhur. Aty ku jemi rrëzuar ne, Jezusi na ka inkurajuar", tha ai.
Imzot Dodaj përmendi solidaritetin me të gjithë, pavarësisht fesë apo kombit, veçanërisht me ata që vuajnë nga bombardimet dhe zhgënjimet në botë. Ai kritikoi kërcënimet, shantazhet, blerjet dhe interesin e momentit. "Tirana pa Zotin është një qytet i fikur. Tirana ka nevojë të zbulojë Zotin. Nëse të gjithë kemi parimet e Zotit, vendi do jetë më i mirë", nënvizoi ai.
Në lutje, besimtarët lanë te Zoti familjet në vështirësi, të rinjtë e bullizuar dhe të burgosurit. Imzot Dodaj vuri në dukje se "burgosja e tepruar nuk është zgjidhje, drejtësia represive mbyt të ardhmen dhe fut frikën".
Ngjarje të ngjashme u zhvilluan në Lezhë, ku dhjetra besimtarë marshuan nga sheshi Gjergj Kastrioti në kala, të udhëhequr nga kleri lokal. Tradita vazhdon të shtunën me bekimin e ushqimeve si buka, vezët dhe djathi për tryezën e Pashkës.