Në vigjilje të Pashkës katolike, Arqipeshkvi Metropolit Arjan Dodaj ka dhënë një mesazh për besimtarët shqiptarë në Katedralen e Shën Palit në Tiranë.
Ai nënvizoi ndjenjën e qenies shqiptare si trashëgimi të përcjellë ndër shekuj dhe borxh ndaj brezave të rinj. "Nga më i madhi tek më i vogli, kjo është ndjesia, dija dhe përkatësia e parë që kemi nevojë t’i përcjellim çdo shqiptari", tha Dodaj. Pashkët, sipas tij, çlirojnë nga logjika pesimiste dhe hapin rrugë për ndryshim, siç bëri Krishti duke dalë nga varri.
Duke cituar Nënën Tereze, ai shtoi: "Bëhu ti ndryshimi që pret dhe do të shohësh në Shqipëri. Të mbjellim shpresë konkrete, Shqipëria ka nevojë për burra dhe gra të ndershme".
Në mesazhin e tij, Dodaj foli edhe për përgjegjësinë politike dhe shoqërore. Ai u drejtua politikanëve duke thënë se "dielli nuk lind vetëm për ju" dhe se pasuritë e vendit janë për të gjithë. Shqipëria ka nevojë për ndërgjegje që refuzojnë korrupsionin dhe padrejtësinë, veçanërisht nga ata me përgjegjësi politike, ekonomike e shoqërore.
Besimtarët marrin pjesë në meshën e vigjiljes që nis në orën 21:45 dhe zgjat deri në orën 01:30 të mëngjesit të së dielës. Një natë më parë, qindra besimtarë katolikë kremtuan Udhën e Kryqit në Sheshin Nënë Tereze në Tiranë.