Pas vendimit të autoriteteve për të ndaluar ceremoninë e bekimit të gurthemelit të kishës së re “Shën Flori dhe Lauri” në fshatin Zogaj të Vushtrrisë, e cila ishte parashikuar për datën 18 gusht 2026, Dioqeza Prizren-Prishtinë ka shprehur kundërshtimin e saj zyrtar. Ipeshkvia deklaroi se vendimi i Policisë së Kosovës është i pajustifikuar, pasi bëhet fjalë për një ngjarje paqësore fetare në një pronë private për të cilën institucionet ishin njoftuar me kohë nga vikari ipeshkvor, Don Fran Kola.
Me qëllim shmangien e tensioneve dhe çdo përplasjeje të mundshme, Ipeshkvi Imzot Dodë Gjergji, i shoqëruar nga meshtarë dhe besimtarë, e zhvilloi bekimin e gurthemelit në mënyrë të qetë më 17 gusht, në vigjilje të festës së Shën Florit dhe Laurit. Dioqeza theksoi se ky veprim nuk përbën heqje dorë nga të drejtat e saj dhe se do të vazhdojë të kërkojë respektimin e lirisë fetare përmes rrugëve ligjore.
Ceremonia e pagëzimeve u mbajt më 18 gusht, në orën 11:00, në Katedralen “Shën Nënë Tereza” në Prishtinë. Gjatë fjalimit të tij, Ipeshkvi Gjergji bëri thirrje për paqe dhe bashkëjetesë ndërfetare. Ai theksoi se Kisha nuk dëshiron të përfshihet në përplasje dhe se liria e individit për të zgjedhur fenë duhet të respektohet. Sipas Ipeshkvit, urrejtja nuk duhet të marrë përgjigje me urrejtje, duke kërkuar që shembulli i bashkëjetesës ndër shekuj ndërmjet besimtarëve të ndryshëm në vend të ruhet edhe në të ardhmen. Ceremonia përkon me festën e martirëve të hershëm të krishterimit në Ulpianë, Shën Florit dhe Shën Laurit.
Përditësime
Dhjetëra qytetarë protestuan sot në Zogaj kundër ndërtimit të një kishe në këtë zonë. Protestuesit pretendojnë se në fshat nuk ka banorë të përkatësisë fetare katolike dhe ngritën akuza për ndikime të jashtme, duke i cilësuar ato si 'serbo-ruse'. Policia e Kosovës shtoi forcat e sigurisë në terren për të monitoruar situatën dhe për të parandaluar përshkallëzimin e tensioneve.